0 comentarios comentarios

Epidemioloxia. Lesións Neoplásicas

.

A pesar da elevada incidencia e morbimortalidade das lesións cutáneas neoplásicas, non existe como tal unha estatística xeral no ámbito nacional nin autonómico sobre a prevalencia. Con todo, si existen datos sobre a incidencia dos tipos principais de lesións cutáneas neoplásicas na práctica clínica.

No que se refire ás lesións cutáneas neoplásicas primarias, o carcinoma basocelular é o tipo máis frecuente, cunha incidencia de ata 253 casos/100.000 habitantes/ano nun estudo realizado na área de Cataluña. En canto ao carcinoma espinocelular, a segunda variante máis frecuente, en España estímase unha taxa anual de entre 72 por 100.000 habitantes para as mulleres e 100,8 por 100.000 habitantes para os homes. Finalmente, no que se refire ao melanoma, segundo os datos publicados polo centro nacional de epidemioloxía (Instituto de Saúde Carlos III), a incidencia anual de melanoma en España sitúase nunha taxa anual axustada á poboación europea de 6,14 en homes e 7,26 en mulleres por 100.000 habitantes.
En canto ás lesións cutáneas neoplásicas secundarias, a pesar de que a súa incidencia global é menor que a das primarias, son probablemente os tumores que poden orixinar con maior frecuencia úlceras tumorais de gran tamaño e morbilidade asociada, que requiren coidados específicos de enfermería, habitualmente con fins paliativos, de soporte e tratamento das complicacións. Considérase que aproximadamente entre un 5-10% dos pacientes con cancro metastásico desenvolverán unha úlcera tumoral.
De forma xeral, os tumores de orixe extracutánea que producen lesións cutáneas con maior frecuencia, xa sexa por contigüidade ou por metástase a distancia, son o cancro de mama en mulleres e de cabeza e pescozo en homes. Outros tumores que producen infiltración cutánea con menor frecuencia son: pulmón, colon/recto, ovario, vexiga, ril, sarcomas... Aínda que cada neoplasia maligna pode metastatizar a calquera localización corporal, algunhas neoplasias teñen predilección por certas rexións. Os tumores de mama que metastatizan a rexión pectoral ou parede torácica son máis frecuentes en mulleres (entre un 39-62%), mentres que en homes a metástase en parede torácica adoita ter orixe a nivel pulmonar. Outras localizacións frecuentes en metástases cutáneas son: cabeza e pescozo (entre un 24-38%); costas, tronco ou abdome (entre un 1-3%); ingua ou axila (entre un 3-7%); e xenitais (entre un 3-7%).

 


 

Comentarios:
Non se realizou ningún comentario
Publica o teu comentario
  •  
  •  
  •  
Xunta de Galicia © Xunta de Galicia. Información mantida e publicada en internet pola Consellería de Sanidade - Servizo Galego de Saúde
Galicia o bo cambio